Публикация осуществлена по изданию: Мельнікаў А.А. Кірыл, епіскап Тураўскі. Жыццё, спадчына, светапогляд. Монография Алексея Анатольевича Мельникова включает в себя самое полное на сегодня собрание произведений, которые с той или иной долей уверенности можно приписывать перу Кирилла Туровского. Авторство ряда текстов, безусловно, может вызвать споры, однако обходить вниманием эти тексты вряд ли уместно.

Послушайте, братие, и разумейте, чада, каковы есте веровати в единого Бога сущаго в Троици — в Отца и Сына и Святаго Духа, и на Того единого уповати и поучатися, приничющи в реченыя святыа книгы и яже суть Евангелие, Апостол, Паремиа, Псалтирь и прочая святыа книгы, а в отреченыа не приникати отинудь. Отреченыа же книгы се суть: Астрономия, Звездочетья, Сонник, Волховник, Зелейник, Птичи чарове, Колядник, Громник, Метание, — в нем лжюще пророчествуют и на святыя лжу възлагают, — и прочаа книгы, имиже беси привабливаючи, беседуют с ними суть, иже в святых книгах писана словеса ложнаа на соблазну невежам и вся яже суть им подобны. То бо суть книга халдейскыя кощуны, еллиньскыя басни. Да аще кто от безумных речеть, да чему святыи ты книгы дръжали, ты же отвещай сице: Святии бо имели ум добр и не превратен и разум, даный Богом, да и ты книгы имуще не превратишася, ни по учению тех книг ходиша, но ходили по учению пророческу и апостольску. А еретици святыя книгы имели, но разума добра не имели, данаго Богом, да того ради превратишася и нарекошася еретици, отступницы Божии. Въсмердела бо ся бяше душа их от сикеры винное, и тако ослепоша очеса их сердечнаго разума, понеже бо престол пался подгнив, стоя прокисли, истлев от злаго того сморода, на немже почивает разум; разуму же негде бысть почивати и избеже вон, а диавол разум всели. И расплодися в них учение диаволе, быша еретици, и нача хулы многы приносити на Бога, не разумеюще приточь книжных, ни разумных слушающе, ни покаряющеся, ни послушающе учениа истиннаго и учащих ненавидяще, ведущих учением в жизнь вечную, а неслушающии и непокоривыи идуть в муку вечную. Преже бо того Павел апостол непокоривыя и непослушливыя веляше сотоне на казнь, сих же еретик святии отци, не могуще ума их безумнаго и непокорливаго наказати учением книжным, не предаша их на казнь сотоне, но прокляша а, ведуще, яко сотона их не казнить, но ждуть их вечныя мукы, идеже будуть привязани с учителем своим диаволом, но тъй есть учитель непокоривый непокоривым. Тако бо и Павел пиша к святым и епископом и попом: Аще кто вас съблазнится невидением книжным, да поучите его; али не послушает, ни покорится по первем и по вторем наказании, да отвержется на проклятие и проклят да будет. Да се ныне мнози суесловци непокоривии и по десятнемнадесят наказании не послушают, что убо будет таковым! Не тем же ли будуть обещници проклятым?

Мы же, братие, будем покорливии и послушливы, творяще Божественаа повелениа святых книг, приничюще в ня, не пианым умом, но трезвым умом чтити жизнь вечную со всеми праведникы покоривыми о Христе Иисусе, о Господе нашем, Емуже слава!

• Публикация по изданию: Никольский Н. К. Материалы для истории древнерусской духовной письменности. СПб., 1907. С. 81—82.
• Мельнікаў А.А. Кірыл, епіскап Тураўскі. Жыццё, спадчына, светапогляд. 2-е выд., Мн., 2000. (Издание Института литературы им. Янки Купалы Национальной академии наук Беларуси).